放年假之前，Jennifer Aniston同Brad Pitt喺SAG嘅合照成為一時佳話。我見好多人嘅IG都不斷比心比”how sweet”...認真咩？
試諗下如果你係Jennifer嘅閨蜜，當年你得知Pitt戲假情真毅然出軌，決定同Jolie一齊而同Jen離婚之後，有幾多個凌晨你陪佢喊到第二朝聽佢訴苦？有幾多次旅行你去咗陪佢散心？有幾多個晚上佢飲到爛醉係你親自送佢返屋企？有幾多次爭你哋啲反面因為你想好好鬧醒佢要佢move on？睇住個bff溶溶爛爛心痛又可憐，到最後終於正式脫離toxic關係，融入正常生活你都戥佢開心。And then十年後，當Jolie決定同Pitt離婚幾個月之後，你嘅閨蜜話考慮想同返而家單身嘅前夫一齊，而你嘅回應竟然係”how sweet”?
你真係唔識㗎啵！
當然，究竟呢次係”好馬不食回頭草”，定係”好草不怕回頭吃”就真係當事人先知，但係”信任就好似一張紙，皺咗就算攤返平，點樣都係皺”就真係千真萬確。
遇到曾經傷害自己嘅舊情人想重修關係，有啲咩應該要考慮呢？
破鏡重圓總有裂痕，而你想唔想返回舊情就要考慮能唔能夠接受呢啲裂痕。好常見嘅係，發現另一半出軌，又或者佢重複犯錯踩中你嘅底線，理智話你聽你要立即分手無謂再嘥時間。雖然你對呢段關係感到窒息，但係有啲人可能因為寂寞，或者無自信心，覺得自己唔會再搵個對自己更好嘅人，甚至由於對方不停求原諒，又睇住大家感情咁耐，就同自己講：”其實佢有時都對我好好，亦好痛錫我屋企人....”唔小心因為短暫嘅感動，而忘記當初分手嘅真正原因，最後又重返個cycle入邊無限輪迴。不斷打破自己原則同底線嘅感情結局，最後都只會爛尾收場。
愛情當然美好，但係去到分手，覺得可惜係好正常。好好拿緊自己嘅底線成為benchmark，就唔會令你再次猶豫不決。最初分手就已經驗證咗一對唔適合嘅關係，千其唔好將你一時嘅憐憫當成慈悲大愛，並緊記當初大家分手嘅理由，無必要因為一時心軟去犯同樣嘅錯，令自己再受傷害。放手唔代表認輸，而係你選擇咗令自己重新開始嘅機會，你生存喺呢個世界上，唔係淨係為咗呢一個男人：你一定會搵到更好的人x3！
當然，假若佢承諾願意為你改變(本性難移，真係可以改嘅咩？)繼續經營呢段感情，而你又選擇相信佢嘅話，要維持一段長遠嘅關係，關鍵係信任。就算喺返埋一齊，你又要疑神疑鬼又要不斷提返過去，代表你內心未能完全原諒佢，卻又要假裝原諒，只會令自己更痛苦，亦無法令彼此快樂。更多可參詳過去文章《唔好再提起過去，可以嗎？》同時記住要保持3分理智，畢竟就算你有幾愛一個人都好，假設未來仍然係付錯咗，至少你仍然為自己留咗一點空間。
懷念唔一定要相見
喜歡唔一定要一齊
你要相信
每一種距離都有佢嘅存在意義
共勉之
#要走就瀟瀟灑灑地走
#做揸緊底線的女人
#女人像鹽
看我IG
https://www.instagram.com/missyboni/
Search